NAKATUROG A MANTEKA

“ITONG!” nanakraad ti bulong ti ridaw ti siled nga induron ni Ama Fabian. “Agriingkan!” Nagbannikes iti abay ti katre ti barona.
Kasla maaw-awanan ni Itong a bimmangon. Ania met ni tatangen, ‘ya! inngayemngemna. Kasam-it pay laeng ti turog ket. Kaimas pay ti panagdeytmi ken ni Cass… hell!
“Apay, ‘ya, Tatang?” nagkiremkirem ket inkanayonnan nga indalimanek dagiti nagdulpet payen nga ules ken punganna. “Mangriribukkayo iti turog!”
“Naglaingkan, Don Itong!” impasgar ni tatangna. “Nalipatamon, ‘ya, nga umaynaka dagasen ni Dex?”
“Ta apay koma?”
“Ket no nagtulaganyo idi kalman nga inkay’ agtako ita! Nagadu a maal-ala dagiti kabaddungalanyo. Manguartada a dina oras!”
Wen, agpayso, adda nagsaritaanda ken ni Kumparena a Dex idi kalman. Ngem awan man ita ti gaganaygayanna. Gapu ngata iti pannakasinga ti pannakideytna ken ni Cass?
Nagdiretso iti pagsarban ket nagmulumog. Ikanayonna koman ti mapan iti banio tapno bumuyat ngem isu met a sumungad ni Dex. Baklay daytoyen ti takona.
“Ne, dika met pay nakasagana, Kumpad?” indillaw ti kumparena idi makatadog daytoy iti paraanganda. “Aldawen, ne. Dita maabotan ti kinaugotna, a, no…”
“’Munaka lattan, Pari,” napikaran. Dayta la unay makarkarintar ti kagurana. “Sumarunoakto lattan.”
“Sige ngarud, Pari, ta bareng makaadu da tao. Kuarta daytan!”
“Apay a dika kimmuyog?” inamad kenkuana ni Ama Fabian idi makalikud ti kumparena.
“Kumammetak pay, a, Tatang,” inngayemngemna. “Alangan met nga awan ap-ap ti tian a mapan aguper ‘diay baybay?”
Saanen a nagtagtagari ti lakay. Innalana ti arado ket napannan sinakayan ni Jarsi, ti nuangda a puted ti ipusna gapu iti panangtagbat ti maysa a kabarangayanda a naarab ti mulana. Nalipatan ni Itong a napan kinita ket nagalburoto. Pinugsatna ti talina iti bisinna.
Apaman a nalpas a nangan, simro ti sakitna a pambaritis ket saannan a pinatuloy ti napan nagtako. Innalana ketdi ni Dalusapi iti kulongan daytoy ket isun ti inap-aprosanna kalpasan a napakanna daytoy.
“Ala, agpapigsaka ta mangabakkanto no ilabanka,” kunam no adda nakemna a kinasarsaritana ti manokna. “No mangabakka, igatangankanto iti naimas a kanem.” Nga uray nakamulagatto met laeng nga innapuy ti ipakpakanna.
Agalas diesen idi mapanunotna nga idisso ni Dalusapi ket napanen iti kantina iti tengnga ti purok. Nadanonanna dita dagiti padana a bumibingo.
Intugawna metten ket inimasna ti nagay-ayam. Ngem maibusen ti naibolsana, dina pay napadasan ti nagbingo.
Malas, inngayemngem ti unegna. Ninto met, Amang, ta binigbigatnak a binubuisit! Hmp!
Aldaw. Nabambannog ni Ama Fabian a simmangpet. Nakaisem pay a nakakita iti naipasanggir a tako ni Itong iti sirok ti tsiko iti sikigan ti kosinada. No kasta, addan ti anakna a napan nagtako. Nakaluto met ngatan ket dayta laengen mangan ti obrana. Nasayaat met no kasta, naisipna.
Ngem nalpay ti abagana idi maluktanna ti kaldero. Sangakutsara laeng nga innapuy ti linaonna. No kasta, saan pay a nagluto ni Itong! Ti sobrana itay bigat ti nabati. Nakawara pay dagiti nanganan ti barona.
Ania metten, inngayemngem ni Ama Fabian. Kaanonto, Apo, nga agbalbaliw ti anakko? naitangadna.
Kapilitan a namisok. Pagungtannanto man ti anakna. Napnapananna ngata? Napanna inlako dagiti natakona a gakka ken ni Immang a tindera ‘diay ili?
Nasayaat met no kasta, nakunana met laeng.
Al-alay-ayannan ti innapuy idi sumungad ti anakna. Kasla narba a kasuoran ti langa daytoy. Iti diar daytoy, ammona lattan a sabali ti naturong ti barona. Ti pay laeng suotna a naturog ti pagan-anayna. Ket saan a nabbasa wenno daratdarat la koma. Saan ngarud a ngtako!
“Naggapuam?” immulagatna iti barona.
“Dita man kantina, ‘Tang,” natamnay a sungbat ni Itong. “’Panak man nagpalabas ti oras!”
“Ania?” immulagat ti lakay. “Naglaingkan! Kunak man no napanka nagtako? Dayta ketdin nakisugal ti inunam!” Ammona lattan nga awan sabali a ranta ti barona iti kantina no di ti makibingo kadagiti kalugaranda. Dita ngamin ti paksol dagiti aggagatel ti ramayna nga agkulogkulog.
“Ania koma ti dakesna, ‘Tang?” insumra ni Itong. “No mangabakak, di nasayaat ta adda igatangko iti kalduenta!”
“Laglag! Barusngi la nga agpayso ti panagrasrasonmo!”
“Sumardengkayo kadin, ‘Tang, ket, ne, mabisinakon. Aggaokayo ketdin ta mangantan!”
“Dika inlak-am!”
Iti siudot ni Itong, innalana ti iduldulinna a nakamulagat a beinte iti kuartona ket nagsubli iti kantina. Idi agsubli, addan iggemna a kornbip. Nalpas metten ni Ama Fabian a nangan. Aging-ingat iti sirok ti tsiko a nasangpetan ni Itong.
“Innawamto ti panganam,” impakamakam ti lakay idi sumreken iti kosina.
Dakayton, a! indayamudomna.

AGSAPA. Masiudot manen ni Ama Fabian ta di pay nakariing ni Itong idinto ta simmiripen ti init. Apaman a nakakammet, innalana ti radio ket sinubuanna iti kaltrids. Impigsana iti uray la idi umaweng ti paboritona a samiweng.
Ay, sadut, bumangonkan/ Kitaem man ti aglawlaw/ Siksika lat’ nakaiddan/ Ay, nakakumotka pay la’ng…
Iti siledna, masiudot ni Itong a bimmangon iti pannakakurikor ti lapayagna. Ammona lattan nga isu ti pangpangngegan ni tatangna. Dinarasna nga indalimanek ti nagiddaanna sa nagdiretsuanna nga iniddep ti radio.
“Apay nga iniddepmo, Langgong, ket agdengdengngegak?” inkusilap kenkuana ni Ama Fabian.
“Ti la dengdenggenyo! Ammok, a… siak ti pangpangngeganyo!” immisuotna. “Mangriribukkayo iti ridep!”
“Wen, a, Don Itong!” inngernger ni Ama Fabian. “’Sinoka koma a mamagbaga kaniak? Di ket dayta bagim ti adalam! No kastam laeng, puotem ti kunak, agrakayaka nga ang-ang!”
Tapno saanen a lumanlan ti saritaan, pinanawanen ni Itong ni Ama Fabian. Nagdiretso iti kosina ket linuktanna ti kaldero. Ngem ad-addan a narubroban ti siudotna idi makitana ti linaon daytoy. No palausen ti manarita, awan pay sangagemgem ti innapuy!
“’Tang!” inlaawna. “Aniakay’ metten! Dikay’ pay nangibati iti makan!”
“Agyamanka ketdi ta adda pay ittip nga imbatik!” imbales ketdi ni Ama Fabian a nanglukat manen iti radio. “Aglutoka iti kanem no di agkanay dayta!”
No ket bimmangonkan/ Itarayamon ‘ta nagiddaam/ Ayatmo la a makadanonkan/ Iti dulang nga inka panganan…
Kapilitan a nangisaang nupay makurkurikoran latta dagiti lapayagna iti samiweng a dengdenggen ti amana. Ad-adda a rimsik ti siudotna idi di sumged dagiti kayo. Medio naatada pay laeng. Nakaas-asuken iti kosina iti kapupuyotna.
“Hmp!” immesmesna. “Awan ti nagango a kayotayo, ‘Tang?” inamadna iti amana idi tumadog daytoy iti kosina.
“Awan, a, ta dimo met ammo ti mangayo wenno agbalsig la koma. Nagadu dagiti nagupong a nagdadakkelan a kayo dita kamarin. ‘Su nga anusam dayta naata!” Nagsubli daytoy iti salas ket iniddepnan ti radio ta nalpasen ti samiweng a dengdenggenna. Rimmuaren a mapan iti bangkag.
Gapu ta di met laengen makapadarang, kapilitan nga innala ni Itong ti wasay ket napan nangbagkat iti sangagupong a kayo iti kamarin sa sinigsigitna daytoy. Aggarudugoden ti tianna idi makaluto. Nangtaray iti tallo nga itlog ti mangukop a manok ti amana ket daytoyen ti inkamakamna a linuto.

DOMINGO. Nasapa a nagsukat ni Itong. Mapan makimisa tapno saan a sangkaibaga ti amana a bin-ig a kalokuan ti adda iti biagna.
Napamulagat pay ni Ama Fabian idi makita daytoy a suotna ti kakaisuna a maong a pantalonna nga inasmanganna iti puraw a t-shirt.
“Papanam?” inamad ti lakay.
Imbagana.
“Nasayaat met ta bareng agbalbaliwkan ket malunagen ti nakaturog a manteka a kanayon nga imetmo!”
“Tatang met…” kasla agpauyo nga ubing. “’Wan pay nasayaat nga inaramidko...”
“Ket adda koma ngarud?”
Saanen a simmungbat iti suronna. Ngumayengmgem a nagturong iti haywey. Inamparana a dagus ti simmungad a traysikel ket nagpaitulod iti simbaan.
Bumabbaban iti traysikel idi masulek ti imatangna iti dumdumsaag a babai iti traysikel a sinarunoda. Ni kadin Sol dayta? nasaludsodna iti bagina. Ngem imposible! Saan met a pananguyaw, kunana, ngem kasla kakalkali a kamotit idi agkaadalankami dita Ballesteros National High School! Sursuronenmi pay ngarud idi iti Ading Moti a pangyababaan iti kamotit. Ngem apay a kasla met naukisan a bawang itan?
“Manong Itong, ti suplim, ne,” kinuna ti drayber a ni Teody ngem dinan inkaskaso. Sinarunona ti babai.
“Galante ita ni Manong Itong ita, a!” kasla di mamati ni Teody.
Kasano ket naruamen dagiti agpadaya a traysikel iti kinakuripotna. Paruarenna uray salapi a suplina.
“Miss, agurayka!” kinamakamna ti impatona a ni Sol.
Nagsardeng met ti babai. “Raquelito?” nagkuretret ti muging daytoy idi makitana ni Itong.
“Sol?”
“Wen. Komustakan?”
“Daytoy… rigat la ti adda a kagubgubal. Sika ngay?”
Nagtarusda iti maysa a restaurant iti puseg ti ili kalpasan ti misa. Naammuanna ni Itong a kabakbakasion ni Sol a naggapu iti ballasiw-taaw. Iti Lebanon!
“Diak koma pay kayat ti agawid ta awan met la ti trabaho ditoy ngem ania ngarud ket karadkad met ti nakataya sadiay!” kinuna ni Sol.
Dua a lomi ken sopdrink ti pagsangsanguanda. Ni kano Sol ti makaammo iti bayad. Nakayaman pay iti nalimed ta kinaagpaysona ti laeng pagpletena ti naibolsana. Nalipatanna ti sigsiglotanna a sangagasut iti pandag dagiti badona.
Nakababain a ni Sol ti agbayad ngem ad-adda a nakababain no ipettengna nga isu idinto ta awan met kuartana. Nalaka, ‘ya, ti maibabain! Dina la kayat ti aginnaw.
“Naimbag ta awan inyawidmo a kameng ti Isbola,” inyangawna.
“Awan latta ti nagbaliwam,” nagbukar ti apagbingngi nga isem ni Sol. “Sika pay laeng daydi klasmeytko!”
“Wenno addan Lebanese nga imbatim sadiay ket agur-uray laengen a sumardeng ti riribuk sanakanto umay alaen ket agnaedkayon sadiay?”
“Itongka, a! Adda kadi met mayat iti kakalkali a kamotit? Ken pagan-anok koma ti diak kadaraan?”
Nganngani naipdokan kadayta a kinuna ni Sol. Malagipna pay la gayam daytoy dagidi inar-aramidmi nga agbabarkada, inkallatik ti panunotna.
“Pakawanennak koma, Sol…”
“’Niaka ketdin, ‘ya… Simmurotak pay la koma ngarud kenka ditoy no adda gurak kenka?”
Kasla nagkanta ti barukong ni Itong kadayta a nangngegna. Ket dina napuotan ti nagarapaap a kampay idi addada ken Sol nga agdedeyt iti baybay. Buybuyaenda ti ileleggak ti init ken ti naumbi a panagbangon dagiti allon a mangdildilpat iti kadaratan. Nga inton maumada, magnada a dapandapan a mangunor iti kadaratan idinto nga iggemna ti dakulap ni Sol. Sadanto agtugaw a saklotna ti balasang. Anian!
Ngem natukay ti panagar-arapaapna idi kidagen ti suli ti panunotna. Kayatnaka ngarud ni Sol, Lusngi, ket awan met pangbiagmo kenkuana? Tarimaanem pay ti biagmo sakbay a lemmesem ti bagim iti arapaap!
Nabainan ket kasla intayab ti angin ti marikriknana itay a duayya.
“Manon ngay ti putotmo?” pagammuan ta sinaludsod ni Sol.
“A-awan pay, Sol,” insungbatna idinto a sinusopna ti nabatbati a sopdrinkna. “Awan ti nailaw-an kadatao…”
“Diak mamati. Numero unoka nga armendo idi agbasbasatayo…”
“Dayta ti pudno, Sol…”
Dina ammo no namati ni Sol kadayta a kinunana. Ngem nasiputanna ketdi ti bangbangir nga isem daytoy. Immanayen dayta a ragsakna uray idi addan iti balayda. Kasla makitkitana pay laeng ti naamo a rupa ni Sol.

NASAPA a bimmangon ni Itong iti kabigatanna. Nagluto iti pamigatda nga agama. Idi malpas, pinakanna dagiti dingoda sa sinapana ti nagdigos.
Pinatokarna ti samiweng a pagaayat ni tatangna apaman a nakapelles.
…Saan a palso ‘toy paliiwko/ No asino pay ti sadut a tao/ Saan a mapnek sangabandehado/ agbirok pay naimas nga idasarmo!
Oy, sadut, agriingkan/ Dakes kan’ no dika agbalaw/ Yurnosmo ta masakbayam/ Ta lumakaykan a rutayrutay…
Iti kuartona, napabaringkuas ni Ama Fabian iti pannakaitubong iti lapayagna ti Sadut nga ipatpatayab ti radioda. Nasdaaw. Ni kadi Itong ti nagpatokar? simmeksek iti panunotna. Himala!
Ngem kasla naipas ti nakemna idi maisipna nga isu ti pangpangngegan ti barona. Nagalasen! inngayemngemna. Agibalbales?
Awanen ti nasayaat nga aramid daytoy, intanabutobna.
Ngem kasla nabainan ti riknana idi makatadog iti kosina. Nakaluton ti barona.
Ania ngata ti nakankan ti ‘kidiables nga ubing? minulmulmolan ti mugingna.
Nagsangoda nga agama. Prito a tilapia ken salad a bulong kamotit ti sidada.
“Adu pay ti diyo naarado, ‘Tang?” inamad ni Itong kenkuana. Ti pagmulaanda iti utong ken kamotit ti kayat a sawen daytoy.
“Aguyaoy ti dila ni Jarsi no pilitem a leppsen iti agmalem,” insungbatna.
“Ditoykayon balay ta siak ti mangituloy, ‘Tang. Aginanakayo tapno dikayto ket agsakit,” insubo ni Itong ti maudi a kammetna ket nagdiretson a nagammusay. “Agpapigsakay’ ketdin ket ngannganikayon agsala iti Sisid Marino!”
Tinurong daytoy ni Jarsi a nakaparnged iti sirok ti kaimito iti lauden ti balayda. Impakanna ti arado nga adda iti asideg ket inturongnan ti nuangda iti bangkag.
Kasla di pay la mamati ni Ama Fabian iti nakitana nga inaramid ti anakna. Ania ngata, ‘ya, nga agpayso ti naknakan ti laglag? kinunkunana iti nakemna.
Naginnaw apaman a nalpas. Idi makaidalimanek, innalana ti bunengna ket namrayanna a pinuted dagiti sanga ti kakawati nga inyawidna idi kalman. Isu met a lumabas ni Dex a nakabaklay iti tako.
“Ni Itong, Tata?” inamad daytoy.
“Napan nagarado, Barok,” insungbatna. “Apay, adda manen patanganyo a dagasem ita?”
“Awan met ketdi, Tata.”
“Pasensiakan, Barok, ta nasapa a rimmuar.”
“Kasla nagbaliw ti angin ita, a, Tata?”
“Dayta ngarud ti pakasdaawak, Barok! Diak ammo no ania ti simsimrek iti panunotna ta kayatna metten nga iggaman ti witiwit kalpasan ti nabayag a panag-Asanal Bulkayana.”
“Di kad’ nasayaat, Tata, tapno dikay marigatanen a mangbagbaga kenkuana. Kasta metten nga adda katulonganyo iti bangkag.”
“Sapay la koma, Barok, ta agnanayonen ti panangtaluntonna iti naimbag a dana.”

SARDAM. Insuot ni Itong ti kagatgatangna a pantalon ken t-shirt. Sinirigna pay naminsan ti pakabuklanna iti sarming sakbay a rimmuar iti kuartona.
Nakigtot pay ni Ama Fabian a nakakita kenkuana idi agpakada daytoy. Nadanonna ti lakay nga agbasbasa iti Bannawag. Ti paboritona a nobela a Tisoy ti palpalabsanna. Nasiimanna pay nga agrungrungiit ti amana. Adda man ngatan nabasana a nakakikian ti riknana, kinunana iti nakemna.
“Papanam? Ulitem man ket kasla sabalin sa ti nangngegko…”
“Innak pasiaren ‘tay sabong ti biagko, ‘Tang. Agsaganakayo ta iti mabiit, mawagwagen dagita ur-uratmo!”
“Lusngi, adda ngarud ita mangayat kenka? Kinesset la ngaruden ti init ti kudilmo, awan pay maipagpannakkelmo nga adal. Ta ania ngarud, ‘ya, ket kinaykayatmo met ti nagballog idi pagadalendaka kadaydi inam!”
“Ania ket ni Pader Diren, ‘ya, ta awan bilibna iti kakaisuna a saringitna! Idi, kunayo nga awan mangayat kaniak ta kaslaak la nakaturog a manteka. Ita ta nagbalbaliwakon, ti man metten kinatayengteng ti kudilko ken kaawan adalko ti nakitayo! Ngem daytoy ti maibagak, ‘Tang… uray awan adal ti maysa a tao, saan a lapped dayta iti irarang-ayna. Agpursige la ketdi, papananna ngay no di aglupos?”
Balud pay laeng ti dila ni Ama Fabian uray idi makaulogen ti anakna. Nakaalaanna dagita nga ibagbagana? nupay masmasdaaw pay laeng intuloyna lattan a binasa ti naputed itay a pagrungrungiitanna. Urayna la nasipat ti mugingna idi simnek iti panunotna ti agbibiag a bida iti basbasaenna. Namak payen no kas iti bida nga agbabaket? Pordios! Yad-adayom, Apo. Didanto pay ketdin ibaga nga inyalaannak ti anakko iti asawak?

AGBAMBAMBAN ni Ama Fabian kadayta a malem idi mapasungadanna ti anakna nga adda kakuyog daytoy a babai. Nupay adayoda pay laeng, masinunuona a di met maudi daytoy iti langa. Ken saan a baket. Yaman pay, Apo, naitanamitimna. Daytoy ngatan ti ibagbaga ti anakna a sabong iti biagna?
Inurayna dagiti dua.
Ket pudno ti atapna. Inyam-ammo ti barona ti kaduana a nobiana. Sol kan’ ti naganna.
Nadayaw a kasarsarita ni Sol, dayta ti nadlawna. Napintas. Bagayna la unay ti pagat-abaga a buokna iti kimmampuso a rupana. Nalinis ti kudilna ken pangusipeten dagiti matana. Naingpis dagiti bibigna a kasla agar-arimasa a kanayon iti dungngo.
Dina la ket ngarud nagawidan ti bagina a nanglagip kadaydi nagawan. Langitna idi no makitana daytoy. Kasla man makitkitana ita iti manmanugangenna ti ladawan daydi Baket Idang.
Ngem nagapon ti duadua iti panunotna. Ammo ngata daytoy a Sol ti agluto ken aglaba? Panagkitana ket saan a pulos a marugrugitan dagiti dakulapna. Naglilinisda! Kas ngata kadaydi nagawan nga ammona ti aggamulo iti pitak? Ta ania koma ngarud ti pangrugiandanto nga agassawa no di ti agtalon? Awan met ngarud kinabaknang a maisagutko no di ti sangkailgat a talon!
Kasano ngata a napagwen ti laglag? nagapon iti panunotna a ti barona ti kayatna a sawen. Ginayumana?
“’Basang, ania ngay ti nangayatam iti anakko?” inamadna idi agangay. Insardengna ti intuloyna itay nga ar-aramidenna ket sinangona dagiti dua a nakatugawen iti balitang iti sikiganna a pagturturogan ti barona no kasta a leppas-pangngaldaw. “Awan met panggedanna. Ken maysa, numero uno a sa…”
“Tatang,” dagus nga inatipa ti barona. Amken siguro daytoy a makaisawang iti pakaupayan ti ay-ayatenna. “’Kay man ket mangburas iti bunga ti mulak a mangga dita likud ta kanentayo.”
Bunga ti manggak? inrebolusion ti panunotna. Kaano pay a nagbalin a mula ti barona ti hybrid a mangga dita likud? Ket no pinagatangna idi dayta a palakay iti kaanakanna a mangmangged idiay kabisera! Sa ita, bigbigen ti barona?
Ah, ammokon, naisipna met laeng. Agpasikat ti langgong. Ngem pay man…
“Kaano nga immulam ti mangga a…” Ngem dina manen naituloy ti ibagana koma ta dinaras ni Itong a kinallabay. Marabettak met ti isem ni Sol.
“’La ketdin, a, Tatang,” inyumbi daytoy. “Didak kadin pabainan iti sango ni Sol,” inyarasaasna.
Awan naaramidanna. Tinurongna ti sibbol a naipasanggir iti balayda ket napanen iti likud.
Naimas ti pangngaldawda. Kinemmeg ni Itong ti manador a manokda ket daytoyen ti nginurungorna. Makapungtot itay ti riknana ta kakaisuna a manadorda ngem awan ti naaramidanna.
“Adu dagiti manador ti kaarruba, ‘Tang,” kinuna ti barona. “Ta sukatakto met laeng apaman a makakallaysakami ken ni Sol!”
Naalay-ayan met laeng ti riknana idi maangotna ti ayamuom ti lutlutuen ti barona a tinola. Yaman pay, Apo, ta nasunotanna manen ti agluto, naitanamitimna laengen. Ni Sol ti nangtulong kenkuana. Nakitana a di maalumiim daytoy a nangdalus kadagiti bagis. No kasta, saan a namikki ti manmanugangenna!
Nalpasda a nangngaldaw. Intulod a dagus ni Itong ni Sol idi makapalpada. Pinadaananna ti barona iti balitang. Agalas kuatron idi makasangpet daytoy. Nagdiretso ni Itong iti balay kalpasan a nakapagdaydayaw kenkuana. Sinurotna.
“Agpudnoka man, Itong!” kinunana. “Kasano ngay a napagtinnagmo ti ala-Diosa iti kinapintas?”
“’Nia ket ni tatangen, ‘ya, ta awan latta ti bilibna. Siempre, a, ket babaen ti kinapudnok a nagdaton kenkuana. Kadagitoy a panawen, saanen a nasken ti kinaguapo...”
“Ay, diak kayat dayta a sarsaritaem! Dimo kuna nga innalam iti santong paspasan a kunada? Dimo ibabain ti pamiliatayo, langgong!”
“Saan, ‘Tang. Pudno ti ibagbagak. Impudnok ken ni Sol ti nagbalin a kabibiagko sipud nagbalinak a parikutyo. Awan inlimedko kenkuana. Uray ti kunayo a kina-mantekak!”
Napamulagat iti dakkel. Naitured ni Itong nga imbaga dagiti negatibo a galadna?
Ket dinayawna iti nalimed daytoy.
Sabagay, nakunana pay iti nakemna. Dakkelen ti nagbaliwan ti barona. Saanen a kas idi a pagparikutanna daytoy. Dadakkelen dagiti mulana a nateng kasta met dagiti tarakenna a dinguen.
“Ta agsukatak pay, ‘Tang,” impakada ni Itong ket nagturongen iti siledna.
Iti ragsak ni Ama Fabian, innalana ti radio ket pinatokarna ti paboritona unay a samiweng. Iti udina, agiwaras met laengen ti barona iti bin-i a mangituloy iti bangkag a pundarda nga agassawa.
…Oy, sadut, adda pay namnamam/ No la ketdi aggunaykan/ Watwatemon dayta takiagmo/ unnatemon ‘ta ur-uratmo…
(Gibusna)